Skip to main content

Something Stronger - Yumplatok

  • Video/Auslan
Publication date

The Royal Commission into Violence, Abuse, Neglect and Exploitation of People with Disability e bin gad stadi dempla bin mekem ane dempla bin printem, kolem  Something Stronger: Truth-telling on hurt and loss, strength and healing, from First Nations people with disability.

Dr Scott Avery e bin da wan uda bin meke dis stadi. Em glad po spik em Worimi man ane em e prapa dep tu.

Dis stadi e bin kam prom sam stori blo 47 Indigenous pipol uda gad disability. Ane em bin sapot da stadi dat Dr Avery bin mekem  wanem da First Nations Disability Network bin printem wea da buk Culture is Inclusion: A narrative of Aboriginal and Torres Strait Islander people with disability.

Dat stadi bin baut tu kweston:

Wiskain Indigenous pipol uda disable ken tokbaut wen demkain ting ya bin apen po dempla wase: wen e gad paiting, wen pipol trite dempla prapa nugud wei, wen pipol no tekenotis dempla ane wen pipol bin yuze dempla nugud wei ane wen nada nugud samting apen po dempla? Ane mo …

Wiskain Indigenous pipol uda disable ken tokbaut dem gud samting wanem dempla wande apen po dempla wase: piling dat wanem em ken do, ane wanem pridom ol gad po demplaselp, dat em pil em pat blo komuniti? Ane wiskain ting rili go apen po em?

Dr Avery bin paindaut dat sam pipol no wande tokbaut dem nugud paiting wanem bin apen po dempla, bikoz e tu ad po dempla po tokbaut.

Sam nada pipol bin api po tok, solong dempla pil seip wen ol tok, ane dat dempla sabe dat pipol go bilib wanem dempla bin spik ane wanem dempla bin spik e impotant.

Dem pipol uda bin tokbaut diskain paiting, e bin spik dat e no bin apen mata wan taim.

Wen diskain paiting bin apen po dempla e bin ebridei ting.

Sam pipol bin spik dat diskain ting e bin apen po nada pipol wea da komuniti. Dr Avery kole dis ting ‘ol badting apen wea wan ples’.

Sam pipol bin tokbaut diskain wei wanem Dr Avery kolem “paiting wea e bin kam pat blo komuniti’.

Diskain ting e apen wen pipol no bin trite nada pipol wase dempla seim ane prapa daune pipol. Diskain pasin e ken meke pipol sik ane pil nugud.

Diskain paiting e separat dem Indigenous pipol uda gad disability prom komuniti blo dempla. Diswan e ken min dat dempla go gede mo nugudwei gense dempla.

Dr Avery bin spik dat diskain nugud pasin no bin pat blo kalsa blo Indigenous pipol.

Plenti Indigenous pipol bin tokbaut wen paiting bin apen gense dempla. Ane e bin meke dempla fil dat dempla bin luse samting. Da nugud filing dat dempla bin gad e mo strong dan wanem bin apen po dempla.

Wen dempla bin tokbaut paiting wea e bin apen po dempla, dempla bin yuze da word HIT. Nada pipol no bin wande tokbaut diskain paiting.

Dr Avery bin paindaut dat Indigenous pipol uda disable no bin yuze word wase  “empowerment” or “sovereignty”.

Dempla bin wande yuze word wea e tokbaut kip laib, kam strong, ane mata kip go.

Sam pipol bin gad gud piling baut wanem go apen next po dempla, ane dempla spik dat wen dempla tokbaut dem ting, dat e go elp nada pipol.

Dr Avery bin tingbaut dat dis filing po Indigenous pipol uda disable po kip strong ane mata kip go, em prapa impotant wen pipol tokbaut dem nugudwei komuniti.

Pipol uda tok baut diskain ting e go elpe nada pipol em wase “sovereignty” nomata pipol yuze dipren word po explein da wod.

Dis min dat pipol e stat po nomo tokbaut dem nugud wei bat nau tokbaut wea laip blo dempla e stat po kam gud. Dis go min dat dem Indigenous pipol uda disable go stat po pil dat dempla e prapa pat blo komuniti blo dempla.

Indigenous pipol uda disable yuze dem strong wei blo kalsa and dem komuniti blo dempla, po gede hope, kese strong ane pilgud insaid lo dempla.

Dis Disability Royal Commission em e separet prom government ane em wande mit wea disable pipol ebriwea wea Australia baut wen e gad paiting, wen pipol trite dempla prapa nugud wei, wen pipol no tekenotis dempla ane wen pipol bin yuze dempla nugud wei.

Mipla wande lisen dem stori blo yu nomata wea yu stap or wanem problem yu mait gad.

Mipla wande lisen dem stori blo yu ane mipla wande lisen dem stori blo pamle ane dem carer blo yu tu.

Mipla aske yupla po trase mipla. Mipla wande yu po sabe dat yu ken kam ane tok po mipla ane no prait.

Ol dem stori go elpe mipla po sabe wea diskain nugud tritment e apen, aukam e apen, ane wanem demting mas seinz.

Wen dis Royal Commission e go pinis, mipla go gibe ol dem tingking blo yupla po government.

Yu ken gibe mipla da stori blo yu wea dipren wei. Yu ken tok po sambodi wea poun, lo video link, wea leta o yu ken kam ane tok po mipla.

Ip yu wandem, yu ken meke peinting, drawing, dans, sing, o spik da stori blo yu wea langgus blo yu.

Yu ken ringap tok po mipla lo

1800 517 199

Yu ken luk website blo mipla lo disability dot royal commission dot gov dot au.

Or yu ken email mipla lo DRCenquiries@royalcommision.gov.au