Skip to main content

Something Stronger - Djambarrpuynu Yolngu Matha

  • Video/Auslan
Publication date

The Royal Commission dhipal romlil Violence, Abuse, Neglect ga Exploitation-lil yolŋu-yolŋuwal Disability-mirr walal ŋunhi yuṯaŋumirr walalaŋ rom nhirrpan maḻŋ’thunmanharaw ga milkumga dhuwal yäku Something Stronger: Yuwalkŋu dhäwuw ŋunhika ŋayaŋu-wutthun ga ŋula-nhä dhu winya’yun nhaliy dhu ḏalthirr ga ḏawalayirr ŋunha yolŋu mala ŋurru-ḏawalaŋu miḏiku-wurrkmi mala.

Dhuwal ŋunhi nhänharapuy ga ŋurruwarryun ga Dr Scott Avery yäku yolŋu ḏirramu ga bäpurruny ŋayi Worimi ga buthuru dhumuk ŋayi beŋur bili.

Dhuwal ŋunhi maḻj’maram ga nhämaka dhuwal ŋurru-ḏawalaŋumirriny dhuwalaŋupuy wäŋapuy mala yolŋu’yolŋu ŋunhi miḏiku-wurrkmirr mala ga djäma Dr Averywal PHD research ŋunhi djämapuy yolŋu’yolŋuwuŋ Disability Network ŋunhi djorra’ŋur Culture is Inclusion. Dhäwu’ga lakaram Yolŋu’yolŋuwalaŋuwuy ga Torres Strait Islanders-kalaŋuwuy ŋunhi miḏikuwurrkmi mala.

Dhuwalka malŋ’thunmaramany märrma’kurr dhä-birrka’yunawuyndja:

  1. Nhaltjan ŋuli yolŋu miḏikuwurrkmirr mala waŋa marikurr abuse-kurr, yaka ŋuli ga djäga manymakkum ga yaka ŋulika treating wiripuny yolŋuny manymakkum ŋunhi walalka yaka djuḻuḻyun nhina ga wiripu malany ŋayaŋuŋur walalaŋgal dälkum ga yaka dhawaṯthunmaram ŋunhi nhä walalka nhäma.
  2. Nhaltjan ŋuli yolŋu miḏikuwurrkmirri mala waŋanhamirr nha walalaŋ gatjpu’ walal dhu gurrupan ḏal rom djamamirriw, nha dhu milkum ŋuli nhanŋuwuy djäl nhanukinygalaŋuwuy walŋaw ga policy gurrupan ga djäma märr dhu rrambaŋitirr ga yaka ganaŋ’maram walalany nhäŋur malanyŋuŋur, ga nhaltjan ŋayi ŋuli maḻŋ’thundja yuwalktja walŋawunydja walalaŋgunydja walalaŋgal.

Dr Avery-yu maḻŋ’thunmaram ŋunhi yolŋu mala waŋga’waŋgany ga nhina yaka walal djälthirr walalthu dhäwu gurrupan walalaŋguwuy maripuy, bili ŋunhiyi walal ga birrka’yun yan, yuṯa yan ŋunhi.

Wiripu mala djälthirr waŋanharaw bili ŋayaŋu walalaŋ marrparaŋ ga dhäkay-ŋama walal ŋunhi yuwalk balanyany walal dhu gurrupan dhäwu ga nhaltjan walalthu waŋa.

Ŋunhi wiripuwurr malaka waŋanhamirr maripuy ga lakaram ga mariny yaka ŋamaŋamayunapuy gay aka waŋganymirr dhuka mel-gurrupan. Mariny lika bitjan bili bunhamirr gulkumirr yaka waŋganymirr.

Wiripu yolŋu mala waŋanhamirr walalaŋgal wäŋaŋur ga balanya bili maḻ’maram ŋunhi nhaltjan Dr Avery ga lakaram ŋunhi yolŋu ga nhina ‘trauma clusters-mirr’.

Wiripuny malaka waŋanhamirr ŋunhi nhä walal nhäma lika ŋunhi Dr Avery-ka lakaram nhakun ‘structural violence’.

Balanyaray mala mariy ŋulika barrkuwatjkum yolŋuny miḏiku-wurrkmirriny community-ŋur. Dhuwandja mayali’ nhakun walal dhu maḻŋ’thunmaram ga nhämaka dhaŋaŋ mari mala.

Dr Avery-ka nhäma ga waŋaka baṉarra’kum ŋunhi balanya mala mari mala yaka limurruŋ yolŋuw rom.

Dhuwalaŋupuy Ŋurru Ḏawalaŋu mala yolŋu ḻakaramga ŋunhi walalaŋguŋ nhänharapuy maripuy ŋuli djaw’yun walalaŋgal ŋayaŋuŋur. Walal ŋulika bäyŋu dhäwu’ ḻakaranhamirr balanyapuy nhaltjarr walalany gan, yan nhaltjarr  walalany ŋunha ŋayaŋu ŋayathaŋal.

Ŋunhi gan yolŋu’yolŋu waŋanhamin maripuy, walal gan ŋunhi waŋanhamindja wutthunawuynha.

Wiripuny yolŋu malaka yakan waŋanhamin.

Dr Avery maḻŋ’thunmaram ŋunhi limurruŋ yolŋu miḏiku-wurrkmirr mala ŋulika yaka bäki dhäruk nhakun “empowerment” wo “sovereignty”.

Walalnydja djäl ŋunha bala walal dhu walŋamirr dhäwu’ märram ga waŋanhamirr manymakku märr walal dhu ga maḻŋ’thunmaram manymak dhukarr ga guŋga’yunamirr.

Wirpuwurrnydja mala ga ŋayaŋumirriyirr yalala walal dhu  dhärukthu walalaŋgal guŋga’yurr wiripiwurrnha yolŋuny mala.

Dr Avery-ka birrka’yun ŋunhi ganydjarryu ga gatjpuy’ dhuwalaŋupuywal ŋurru ḏawalaŋumirr mala yolŋu’yolŋu ŋunhi miḏiku-wurrkmirr mala mirithirr important marŋgithinyaraw ŋunhika mari marrtji wäŋaŋur.

Yolŋu mala community-ŋur ŋunhi ŋulika bäki walalaŋguwuy dhäruk guŋga’yunaraw wiripuw mala yolŋuw ŋunhiyiny “sovereignty”, Yolŋu’yolŋu nhakun walal dhu waŋa walalaŋgiyingal märryu ga djälyu.

Dhuwandja dhäwuny’ marrtji djambin  beŋur yätjŋurnydja  ga bala baḏarraŋgunhamirrilila, ga dhiyaŋuny ga guŋga’yuna Ŋurru Ḏawalaŋumirriny yolŋu’yolŋuny mala miḏiku-wurrkmirriny märr walal dhu wuṉḏaŋarrthirra ga  balayi roŋiyirr community-lil.

Limurruŋ yolŋu’yolŋu midiku-wurrkmirr ga marrtjin yan bala ga ḏälthirra walalaŋguwuy romgun ga wäŋaw märr walal dhu maḻŋ’maram gatjpu’, ganydjarr ga baḏarraŋgunhamirr.

Dhuwal Disability Royal Commission-dja gäna ga maḻŋ’thunmaramga violence, abuse, neglect ga exploitation yolŋuwal ŋunhi miḏiku-wurrk warrpam’ dhuwal wäŋaŋur.

Limurr djäl limurr dhu ŋäma dhäwu’ nhuŋu wanha nheka nhina ga nhaliy nhunaka ŋayatham ŋayaŋu.

Limurr djäl nhokuŋ dhawu’ malany. Limurr djäl limurr dhu ŋäma gurruṯumirriwuŋ walalaŋguŋ ga djägamirriwuŋ walalaŋguŋ.

Limurr djäl nhumalaŋ nhuma dhu ŋayaŋu nhumalaŋguwuy nhirrpanmirr napurruŋgal,  napurr djäl  märr nhe dhu marŋgi ŋunhi nhe dhu marrtji napurruŋgal ga lakaram nhaltjan ga dhiyaŋ bala.

Nhokal dhäwuy’ dhu guŋga’yun napurruny wanha ga abuse marrtji ga nhaku, ga nhaltjan dhu djambi.

Ŋunhi dhu Royal Commission ready-ny, limurrnydja dhu gurrupulnha dhäruktja mala government-kala.

Nhe dhu ḻakaraŋ nhuŋuwuy dhäwuny’ balandawal phone-gurr, wo video link-kurr, wo djorra’ djäma wo marrtji ga waŋi balandawal.

Nhe dhu ḻakaraŋ nhuŋuwuy dhäwuny’ nhokiyingal mathakurr ŋunhi nhe djälnydja, wo djorra’lil painting wo drawing, buŋgulkurr wo manikaykurr lakaranhamirr nhaltjan nhuŋuka ŋayaŋu waŋa.

Nhe dhu riŋimaptja napurruŋ dhipal nambalilnydja 1800 517 199.

Wo dhipal marrtji website-lil: www.disability.royalcommission.gov.au

Wo nhe dhu email napurruny dhipal DRCenquiries@royalcommission.gov.au